Որո՞նք են Ձեր ընկերության առաջնահերթությունները բիզնես գործընթացների ավտոմատացման հարցում
ERP (Enterprise Resource Planning)
33%
CRM (Customer Relationship Management)
11%
ECM (Enterprise Content Management)
4%
BPM (Business Process Management)
15%
BI (Business Intelligence)
7%
Ավտոմատացման բոլոր նախագծերը սառեցված են
4%
Ավտոմատացման կարիք չենք զգում
26%
"Սոցիալական ապահովության քարտերի" տեղեկատվական համակարգ
"Սոցիալական ապահովության քարտերի" տեղեկատվական համակարգի նպատակն է` ՀՀ քաղաքացիներին, ՀՀ-ում բնակության իրավունք ունեցող և բնակվող օտարերկրյա քաղաքացիներին, քաղաքացիություն չունեցող անձանց ու փախստականի կարգավիճակ ունեցող անձանց տրամադրվող սոցիալական ապահովության քարտեր հատկացնելու աշխատանքների արդյունավետ կազմակերպումը:
Համակարգը նախատեսված է Հայաստանի Հանրապետությունում ֆիզիկական անձանց միասնական նույնականացման/իդենտիֆիկացիոն համակարգի ձևավորման համար: Անհատական տվյալներ պարունակող տեղեկատվական բազաներում սոցիալական քարտի համարը կիրառվում է որպես անձին նույնականացնելու միջոց, որի շնորհիվ կանոնակարգվել և բարելավվել են տվյալներ մշակելու և օրենսդրությամբ սահմանված կարգով տեղեկատվություն փոխանակելու ընթացակարգերը:
Համաձայն "Սոցիալական ապահովության քարտերի մասին" ՀՀ օրենքի` Սոցիալական ապահովության քարտի համարը եզակի է և անփոփոխ, ի տարբերություն այլ փաստաթղթերի, որոնք հատկացվում են քաղաքացիներին (անձնագիր, ծննդյան վկայական, ճամփորդական փաստաթուղթ և այլն): Եթե քաղաքացին որևէ պատճառով փոխել է իր անձը հաստատող փաստաթուղթը, ապա նրան կհատկացվի նոր սոցիալական ապահովության քարտ, որի վրա նշված կլինի նոր փաստաթղթի սերիան և համարը, սակայն սոցիալական քարտի համարը կմնա անփոփոխ:
Սոցիալական ապահովության քարտերի համակարգի հիմնական գործառույթներն են.
Սոցիալական քարտ ստանալու համար դիմած քաղաքացիների անհատական տվյալների և սոցիալական ապահովության քարտից հրաժարվող քաղաքացիների դիմումների մուտքագրում տեղեկատվական բազա` զուգահեռաբար տեղեկատվությունը ճշգրտելով հարակից տեղեկատվության հետ:
Տեղեկատվական շտեմարանի կառավարում` հավաքագրում, կանոնակարգում և արխիվացում:
Ցուցակների, հաշվետվությունների և վերլուծությունների ստացում ու տպագրություն:
Սոցիալական ապահովության քարտերի և սոցիալական ապահովության քարտից հրաժարվող քաղաքացիների դիմումների հիման վրա տեղեկանքների տպագրություն:
Այս գործառույթները իրականացվում են ինչպես տարածքային ծառայություններից ստացված հայտերի հիման վրա, այնպես էլ "Նորք" տեղեկատվավերլուծական կենտրոնում գործող քաղաքացիների արագ սպասարկման կենտրոնում, որտեղ քաղաքացին, ներկայացնելով անձը հաստատող փաստաթուղթ, անմիջապես ստանում է սոցիալական ապահովության քարտ:
2011թ. ապրիլից գործում է նաև սոցիալական ապահովության քարտերի տրամադրման էլեկտրոնային եղանակը, որի շրջանակներում մինչ օրս ներկայացվել է շուրջ 10.000 հայտ:
Տարածքային ծառայություններից սոցիալական քարտ ստանալու համար քաղաքացին լրացնում է սոցիալական քարտ ստանալու հայտ և այն անձամբ կամ այլ անձի միջոցով ներկայացնում իրավասու մարմին` զբաղվածության տարածքային կենտրոն (գործազուրկների հաշվառում իրականացնող մարմին) կամ սոցիալական ծառայությունների տարածքային գործակալություն (ընտանեկան նպաստ հատկացնող մարմին), կամ սոցիալական ապահովագրության տարածքային կենտրոն (կենսաթոշակ նշանակող մարմին): Հայտում տվյալները լրացնելիս հիմք են ընդունվում "Սոցիալական ապահովության քարտերի մասին" ՀՀ օրենքով սահմանված փաստաթղթերը: Հայտը ներկայացնելուց մեկ ամիս հետո քաղաքացին անձամբ, իր անձը հաստատող փաստաթուղթը ներկայացնելով, կամ նրա ներկայացուցիչը` համապատասխան փաստաթղթեր ներկայացնելով, ստանում է քարտն այն մարմնից, որտեղ ներկայացվել է հայտը:
Քաղաքացու ներկայացուցիչ են համարվում. մինչև 16 տարեկան քաղաքացու համար` նրա ծնողը (որդեգրողը) կամ օրինական ներկայացուցիչը (խնամակալը, հոգաբարձուն), դատարանի վճռով անգործունակ կամ սահմանափակ գործունակ ճանաչված քաղաքացու համար` նրա խնամակալը կամ հոգաբարձուն, 16 տարեկանը լրացած քաղաքացու համար` նրա լիազորած անձը: Եթե քաղաքացին դիմում է այլ անձի քարտ ստանալու համար, ապա պետք է ներկայացնի համապապատասխան փաստաթուղթ` լիազորագիրը կամ խնամակալ ճանաչվելու մասին դատարանի վճիռը:
Սոցիալական քարտ ստանալու հայտը լրացվում է հետևյալ փաստաթղթերի հիման վրա, մինչև 16 տարեկան ՀՀ քաղաքացիների համար` ՀՀ տարածքում վավերական համարվող ծննդյան վկայական, 16 տարեկան և բարձր ՀՀ քաղաքացիների համար` ՀՀ քաղաքացու անձնագիր (կապույտ նմուշի), փախստականների համար` նոր նմուշի (կապույտ) ճամփորդական փաստաթուղթ, օտարերկրյա քաղաքացիների համար` կացության քարտ (հատկացվում է այն երկրների քաղաքացիներին, որոնք ՀՀ մուտք գործելու համար պետք է մուտքի թույլատվություն ունենան), օտարերկրյա այն քաղաքացիների համար, ովքեր ՀՀ ժամանելիս մուտքի թույլատվության անհրաժեշտություն չունեն (ԱՊՀ անդամ երկրներ), իրենց` քաղաքացու անձնագիրը կամ ծննդյան վկայականը:
Սոցիալական քարտը անձը հաստատող փաստաթուղթ չէ և չի կարող գործածվել որպես այդպիսին: Սոցիալական քարտի վրա նշված են քարտի համարը, քաղաքացու անունը, ազգանունը, հայրանունը, սոցիալական քարտը հատկացնելու օրը, ամիսը, տարին, ինչպես նաև քարտը հատկացնելու համար հիմք հանդիսացած` անձը հաստատող փաստաթղթի սերիան և համարը: Սոցիալական քարտը գործածելի է այն հատկացնելու համար հիմք հանդիսացած` անձը հաստատող փաստաթղթի (անձնագիր, ծննդյան վկայական և այլն) հետ ներկայացնելիս:
Սոցիալական քարտերի տեղեկատվական շտեմարանը սոցիալական քարտեր ստացած քաղաքացիների անհատական տվյալների ամբողջությունն է, որը ներառում է քաղաքացիների սոցիալական քարտերի համարները, ինչպես նաև քաղաքացիներին վերաբերող հետևյալ տվյալները.
անունը, ազգանունը և հայրանունը,
ծննդյան օրը, ամիսը և տարին,
սեռը,
քարտ հատկացնելու համար հիմք հանդիսացած` անձը հաստատող փաստաթղթի սերիան և համարը,
մահվան դեպքում` մահվան օրը, ամիսը և տարին:
Այն քաղաքացիները, որոնք հրաժարվում են սոցիալական քարտ ստանալուց կարող են դիմել ՀՀ աշխատանքի և սոցիալական հարցերի նախարարություն եւ ստանալ սոցիալական քարտ չունենալու մասին տեղեկանք ՀՀ օրենսդրությամբ սահմանված կարգով:
01.01.2012թ. դրությամբ սոցիալական ապահովության քարտ է հատկացվել 3.248.586 քաղաքացու, որից 589.653-ը քաղաքացիների արագ սպասարկման կենտրոնում: Սոցիալական ապահովության քարտ չունենալու մասին տեղեկանք է հատկացվել 20610 քաղաքացու:
