04-11-2011
Երևանում կբացվի հայ-հնդկական ՏՀՏ գերազանցության կենտրոն
Հայաստանի և Հնդկաստանի կառավարությունների միջև կնքած համաձայնագրի շրջանակում, որը կոչված է խորացնել երկկողմանի համագործակցությունը Տեղեկատվական և Հեռահաղորդակցման Տեխնոլոգիաների (ՏՀՏ) ոլորտում, Երևանում հիմնվել է "Հայ-հնդկական ՏՀՏ գերազանցության կենտրոն":
Կենտրոնի պաշտոնական բացման արարողությունը տեղի կունենա նոյեմբերի 7-ին, ժամը 9:30-ին, Երևանի պետական համալարանի Մաթեմատիկայի և մեխանիկայի ֆակուլտետի մասնաշենքում: Բացմանը կմասնակցեն ՀՀ վարչապետը, այլ պաշտոնատար անձիք, ՏՀՏ մասնավոր ոլորտի և բուհերի ղեկավարներ, ինչպես նաև Հնդկաստանի պատվիրակությունը` Հնդկաստանի կապի և տեղեկատվական տեխնոլոգիաների պետնախարար Սաչին Պիլոտի գլխավորությամբ:
Կենտրոնի հիմնական առաքելությունն է Հայաստանում ստեղծել ՏՀՏ մասնագիտական ուսուցման և այդ ոլորտում գիտահետազոտական աշխատանքների իրականացման համար մի հատուկ միջավայր, որը մեծապես կնպաստի երկրում համաշխարհային մակարդակի բարձրակարգ ՏՀՏ ոլորտի աշխատուժի զարգացմանը:
Կենտրոնի ստեղծման և գործունեության Ծրագիրն իրականացնում են` ՀՀ կառավարության անունից` Ձեռնարկությունների ինկուբատոր հիմնադրամը /ՁԻՀ/, Հնդկաստանի կառավարության անունից` Հաշվողական առաջատար մշակումների կենտրոնը /C-DAC/:
Կենտրոնի ստեղծման և գործունեության Ծրագրի իրականացման նպատակով հայկական կողմը ապահովել է` անհրաժեշտ ենթակառուցվածքով հագեցած, վերանորոգված և կահավորված տարածք, համապատասխան փորձագետներ և աշխատակազմ, Հնդկաստանից ՏՀՏ փորձագետների գործուղումների լոգիստիկ աջակցություն և այլն:
Հնդկական կողմը ապահովել է աջակցություն հետևյալ ուղղություններով` Հնդկաստանից ՏՀՏ փորձագետների գործուղում Կենտրոնը հիմնելու տեխնիկական աջակցություն տրամադրելու նպատակով, հարյուրից ավելի մասնագետների միաժամանակ վերապատրաստման հնարավորություն, PARAM գերհամակարգչի (PARAM super-computer) և այլ համակարգչային սարքերի, ծրագրային ապահովման և սարքավորումների տրամադրում, մասնագետների և դասախոսների վերապատրաստում Հնդկաստանում և Հայաստանում, գիտնականների փոխանակնման ծրագրի իրականացում և այլն:
Կենտրոնի ստեղծման և գործունեության Ծրագրի հիմնական գործընկերն է Երևանի պետական համալսարանը: Կենտրոնի հիմնման աշխատանքներին աջակցել է նաև Համաշխարհային բանկի հայաստանյան գրասենյակը:
Վերադարձ
